Í auglýsingu fyrir viðburðinn var klúbbnum breytt í fréttaver og var Berglind Festival, sem fer fyrir Fréttum vikunnar í þættinum Vikan með Gísla Marteini á RÚV, fengin til að flytja „afar áríðandi fréttir“ um viðburðinn.
Í tilkynningunni þylur Berglind upp nöfn rúmlega 20 tónlistarfólks sem myndu fram koma í fimm ára afmæli Auto. Þetta gerir hún rólega og yfirvegað, eins og ekkert sé í raun merkilegt við þetta allt saman.
Ólafur framleiddi auglýsinguna, skrifaði hana og leikstýrði, auk þess að hanna sérstakt fimm ára afmælismerki Auto. Hlynur Hólm Hauksson skaut og klippti auglýsinguna. Young Nazareth færði hið ódauðlega fréttastef RÚV í dansvænna horf.
Viðburðurinn sjálfur var skipulagður af Ólafi og Sigurði Stefáni Bjarnasyni, rekstrarstjóra Auto.
Ljósmyndir af viðburðinum eru eftir Þóru Ólafs.